逼住做电灯胆
作者：admin 发表于2022-02-02 11:23 阅读(1)
逼住做电灯胆
有老人家感叹，而家啲青年仔真系超级懒，对恋爱拍拖完全系佛系，比“不主动，不抗拒，不负责”仲要上境界，就系“不上心”、“不理睬”、“不行动”，完全阔佬懒理，毫无反应，任你啲阿爸阿妈点样逼婚，催催催都冇用，都好似部泥头车跌落河都不能泛起半点涟漪。
时代唔同，世界变嘞。情窦初开追女子，本来系自然规律，男人本性嘎，而家竟然间冇晒兴趣喔。想当年，胆大心细脸皮厚嘅追女之道，系深入人心，付诸实践吖嘛。而且，初次行动脸红心跳嗰阵，往往要拉埋个沙煲兄弟一齐约会添，啲女仔又会嗌埋一两个闺中密友同村姐妹啊噉，多个人热闹啲，话惊住冇嘢讲冷场大家尴尬咯。
查实，仲有一啲难以启齿嘅顾虑，“孤男寡女共处一室，女仔实有损失”，唔听老人言，吃亏在眼前啊。所以，保险系数好高嘅拍拖模式，就系点都要“三人行”或者一拖三噉样啦。而，嗰啲被逼做电灯胆嘅朋友，就唯有硬住头皮跟随左右啰，好似跟尾狗噉样啰。
电灯胆本来是指电灯泡，但在广东话里的意思通常是指某人不懂得人情世故，影响人家夫妻或情侣的二人世界。
男女谈恋爱，广东话叫做“拍拖”。在六十年代前，民风淳朴，思想保守，两恋人因拍拖而产成的有趣俗语，便有“剥花生”和“电灯胆”。比如话：“人哋男朋友来嘞，你就唔好做电灯胆啦。”（人家男朋友来了，你就别影响人家的二人世界了。）“有个一千瓦嘅电灯胆喺度，我都系走吧啦。”（有个很烦的人在这影响我们的二人世界，我还是走吧。）很多人以为“电灯胆”（即灯泡）的由来，是因发光而影响到恋爱的浪漫气氛。这是误解。其实，有句白话歇后语“电灯胆━唔通气”就说明情况了。灯泡是真空物体，不能通气；“唔通气”，是指一个人不明世情，不懂回避的意思。
当年父母看到女儿有人追求，既喜又怕，担心女儿吃亏，于是，会派幼子幼女陪同姐姐应男友之约。那时候男女拍拖，多了一个幼童同行，是件平常事。这个阻手阻脚，不知趣者，叫做电灯胆。而这个妨碍两口子喁喁情话的行为，叫做剥花生。
记得，有一首粤语歌《电灯胆》，讲述嘅系邓丽欣出道后冇机会拍拖嘅自白，唯有做友人嘅“电灯胆”而得以慰藉嘅一首歌。“善良人埋藏着最坏的心眼，妄想一天你们会散会选我吗？”啲歌词唱出好朋友恋爱后嘅微妙而复杂嘅心理变化。
呢首歌可以话系备胎伤感情歌，从侧面警告我哋防人之心不可无，必须远离心机闺蜜。
所谓：一样米养百样人。现实生活当中，日防夜防闺蜜难防，确实系活生生嘅例子。咪以为满口仁义道德嘅就一定系正人君子啊，咩“朋友妻不可欺”，喺不知廉耻面前都系废话。好多时，生滋猫入眼，虎视眈眈流晒口水，见色忘义嗰阵，就会变成“朋友妻不客气”嘎啦，“勾二嫂”有咩咁出奇啫？近水楼台先得月，兔子专吃窝边草，自己人好落手吖嘛。
乜你以为你哋两个情比金坚，打风都打唔甩咩？一旦你揾嘅电灯胆系闷骚型嘅，唔声唔声吓你一惊，攻心计搞咩放电挑逗，趁你唔觉意发啲咩暧昧信息啊噉，搞啲丝袜诱惑啊制服诱惑啊噉，眉来眼去一拍即合嘅话，又或者渣男渣女本色想一脚踏两船嘅话，你仲蒙在鼓里，被人撬咗墙角仲以为好稳阵，就认真可怜咯。
所以啊，正经人就咪去做电灯胆嘞，好好揾一个爱你嘅人。你要拍拖嘅，就自己顾掂自己，咪叫人做电灯胆，为咗他人和自己嘅幸福，防火防盗防闺蜜啊。
男大当婚，女大当嫁。虽然话系到咗21世纪，个性解放，生活多元化啫。但系如果可以嘅话，揾翻个啱自己嘅人，两个人甜蜜过日子肯定比一个人孤单寂寞要好。咪一味对住电脑玩游戏啦，揾人约会，密密斟啦。