散装英文搞搞震
作者：admin 发表于2022-02-02 11:27 阅读(0)
散装英文搞搞震
凤姐：Honey!埋嚟，埋嚟，好唔好睇啫？
勇哥：Good！是但都得啦，去Barbecue嗻嘛，又唔系去见官，使乜着到咁隆重啫？
凤姐：哼哼哼，唔通换件睡衣去Say hello嘞喔？烧烤就唔使注意形象吖嗱？所以话你哋呢啲臭man叻，样样都话是鬼但，求鬼奇，随随便便噉样，噉点见人啊？
勇哥：呵呵呵，麻甩佬搞埋晒啲花笋有乜谓啊？我点都得嘎，着孖烟囱出街都冇问题嘎。你估去相睇咩！你条裙几多money啊，大嗱嗱成千银嘅啵，点会cheap得夹，唔使问阿贵，梗系好睇嘎啦。
凤姐：噉你即系话，系件衫靓，唔系你老婆靓嘅啫？
勇哥：No，no，no！我娘子天生丽质，Very，very beautiful ！哒呤，你睇下啦，块镜啵一声崩咗，Oh，My God！靓爆镜啊！
凤姐：哈哈哈，算你啦，佛靠金装，人靠衣装吖嘛。老婆着靓啲，出到外面，你都有face啦。系呢，你话我今晚着黄色好，定系着白色好啊？着长裙好，定系短裙好啫？好唔好着高踭鞋啫？配边个手袋啱啲啊？
勇哥：Oh，oh，oh！I服You啰！Yellow？White？Long or short？你钟意就得啦，我啲taste唔得嘎，同你讲讲下，人有三急添，等我去一转WC放少几两先。
凤姐：嗯，系Ilove you，唔系I服You！知你嘎，又响度借尿遁。怕你啦，快啲去换件企理啲嘅衫，准备出门嘎啦。男人四十一枝flower，咪下下着到好似大叔噉嘅款啦，唔失礼人，都失礼我啊，你究竟明唔明嘅啫？Do you understand？
勇哥：I see，I see.放心啦，我绝对唔会剥光猪裸跑嘅。
……
凤姐：相公，I等You啊。行得未啧？
勇哥：我OK嘎，你呢，O唔OK？
凤姐：Hi!哇！呢匀真系执到试正好多啵，噉至系吖嘛，噉先至衬得起我吖嘛。
勇哥：够man啦，搭只手过嚟，转翻两圈，畀你enjoy下型男嘅气场……
凤姐：哈哈哈，服you，服you！I Want 晕，晕嘞。以为偶像添，不过你啲行装出卖咗你啦，又带凉茶又带鸡粥啊噉，又老土又婆婆妈妈噉样，吓亲人添。人哋嗰度唔冇水畀你饮咩？
勇哥：老土？边个话嘎？传统嘢，畀钱都买唔得啊。嗰边有tea，有cake，有 Coffee，边够我啲私家货咁好啊？烧烤好易上火喉咙痛吖嘛，煲定凉茶包冇错嘅，我嘅鸡粥好食过酒楼啲大厨拿手菜啦，齐齐分享下唔好咩？最紧要大家Happy嘛。
凤姐：系啦，系啦，最佳煮男就系你啦。锡啖先！We出发啰！
勇哥：Let’s go！