有风唔好驶尽艃
作者：admin 发表于2022-02-02 11:35 阅读(2)
有风唔好驶尽艃
广东人唔抵得边个巴巴闭闭、招招积积、虾虾霸霸啊噉，就会指指戳戳细细声话嗰个人系“有风驶尽艃”。意思系话，佢在得势嘅时候仗势凌人，一朝得志就不留情面噉使唤（贬低）别人。
艃，喺古汉语里面，原来系一种船嘅名称，后来就泛指一般嘅船只，或者系指风帆。由于“艃”与“利”粤语发音接近，所以经常有人讲成或写成“有风唔好驶尽利”。
大家都知道“一帆风顺”系咩意思啦，系顺风顺水嘅美好祝愿。而，“有风驶尽艃”，字面解释就系：有风就能行驶得更快。意思是话：趁着有风把帆扬尽，从而更好噉样利用啲风嚟启航。因为古代帆船行船嘅经验之谈呢，就系：喺航行嘅时候，遇到顺风嗰时就要扬满帆，全力前进，又快又省力。所以，当船员意识到有风嘅时候，就大可以瞓喺船上面，让风和洋流帮你行船。引申开来，即系当你意识到机会到来嘅时候，就要做好一啲准备。比喻做人做事，顺势而做，顺水推舟，把握好时机做好事情。
旧阵时，船上仲未装发动机嘅年代，水上人家最讲究嘅技术，大概就是“驶艃”嘞。风由边边吹，方向喺边度，风大定系风细，“驶艃”嘅人都要心中有数，然后先至能够扯住嗰张“艃”，恰到好处噉样，或者放大一些，或者缩细一点，一阵向左拧，一阵又向右拧，总之就系要做到“船行八面风”，“见风使帆”咯。
但系，实际上，顺风顺水嘅时候，船都唔会挂满帆嘅啵。点解呢？所谓物极必反，如果乘风破浪，再将船帆鼓到满、扯到尽，船就有可能失控，甚至会触碰到江流中嘅礁石而船毁人亡。因为张满帆，受力就大，速度就快，就好似在马路以时速二百公里行驶噉样，一有突发情况，你要刹车都来唔切嘞。
“有风驶尽艃”呢句话好有深意啊，估计呢句谚语嘅原创之人，应该系长期行船嘅船老大吧。所以，喺粤语里面，“有风驶尽艃”，后来演变就并唔系顺势而为嘅意思啵，而系为所欲为，暗藏风险之意。好多老人家都会教导啲后生仔女：大家要记住啊，有风，都唔好驶尽艃啊！意思系话，行船嗰阵，风大，帆就千奇唔好扯帆扯到尽，慎防收缆收唔住，容易触礁出大事，就险过剃头！
行船系噉，做其它事情亦都一样道理，有干劲系好事，但系要留有余地，劲头要使得啱啱好先至最理想。特别系有啲事情，唔能够做到绝，要留有余地、留啲后路。比如话当你得意之时，当你有权有势，大把银纸，亦都唔应该有福享尽，太过奢靡，要适度有节制，预防万一。当你顺境嘅时候，利用当时得令嘅风头要适可而止，风头太盛就危险嘞。
所以，广州话“有风驶尽艃”，“有风唔好驶尽艃”，其实就系告诫人们做人处事要留有余地，不能做得太绝，没有周旋余地。这个俗语充满哲理，话畀我哋知：做生意唔好唯利是图，唔好太追逐利益，要注意风险。处理人与人之间关系，要留有余地，留有后路，要有包容之心，得饶人处且饶人。最骤忌系得势就为所欲为，仗势欺人，甚至赶尽杀绝。只有善待他人，大家才能和睦相处，不会相互仇恨。
系嘎，凡事都唔好做得过分。好多嘢讲唔埋嘅，风水轮流转，三十年河东三十年河西，每个人都有三衰六旺吖嘛，你今日系威系势啧，难保第日“头发乱了”吖嘛。做人嘅嘢，凡事留一线，日后好相见。就算而家自己几犀利都好啦，与人为善，低调啲肯定冇错嘅。做人，就算几富有、几风光，几有权势，几有才能都好啦，都唔好锋芒毕露，唔好以富压贫，唔好仗势欺人，唔好恃才傲物，唔好目中无人，凡事要留有余地，否则，因住日后落得个唔好嘅下场啊。